حصة رياضة !

حصة رياضة !

فتحي حلواني – عكاظ

زمان بس ما حقولكم قبل كم سنة عشان لا تقولوا ابو فتو ده مولود من أيام هتلر، زمان أيام ما درست في مدرسة عبدالله بن عباس الابتدائية وكان مدرس حصة الرياضة عبدالله الجهني وفي مدرسة السعودية المتوسطة وكان مدرس حصة الرياضة عبدالرحمن تردي وفي ثانوية الشاطئ لما كان يدرسنا سعيد متولي وجميل حسب الله كانت حصة الرياضة من أهم الحصص اللي يهتم فيها مدرس التربية الرياضية لانه بيحاول قد ما يقدر انه يكتشف مين من الطلاب مميز في بعض الألعاب اللي كنا بنمارسها في حصص الرياضة سواء في الجمباز أو الجري أو ألعاب القوى أو كرة القدم أو الطائرة أو اليد أو السلة، والسلة دي ابعدووني عنها لانه انا ما لعبتها لأني بالمرة (طووويل) عشان كده ما حبيت أكون محترف فيها، يعني بالبلدي كان كل أسبوع بنمارس لعبة من الألعاب،

كانت حصة التربية الرياضية مهمة في المدارس وكانوا مدرسي الماده يهتموا فيها لانهم كانوا كل أسبوع بيعطونا شكل من أشكال الألعاب الرياضية وكانوا الطلبة المميزين في بعض الالعاب بيشاركوا في كل الالعاب اللي بتعتمدها إدارة التعليم لكن في الوقت الحاضر لما تجي حصة الرياضة تلاقي بعض المدرسين وخلو بالكم من كلمة (بعض) يفتح باب الغرفة اللي فيها الأدوات الرياضية وأخد الكوره منها ورماها على الطلبة ويللا يا طلاب طقوها والحقوها وعلى كده طول السنة والمفروض انه مدرس التربية الرياضية يجلس مع الطلبة وياخد ويعطي معاهم في الكلام ويسألهم عن الألعاب الرياضية اللي يحبو يلعبوها ويحاول قد ما يقدر انه يخلي لكل أسبوع رياضة معينة سواء كانت في السلة أو الطائرة أو اليد أو الجمباز وبكده حيكون عندنا لعييبه مميزين في جميع الألعاب والا انتو ايش رايكم ياحبايب، وعيشوا كتيييير تشوفوا كتيييير.

التعليقات (٠) اضف تعليق

اضف تعليق

بريدك الالكترونى لن نقوم بأستخدامه.

You may use these HTML tags and attributes:
<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>


(مطلوب)